Третиот семинар за коноп следниов викенд!

Драги поддржувачи на легализацијата на конопот во Република Македонија!!!  

420macedonia ви пренесува одлични вести! Конечно, на наше огромно задоволство, во името на здружението Зелена Алтернатива - ЗА, официјално ве покануваме да ни се придружите на третиот по ред семинар од циклусот за демистификација на конопот што го организира токму ова извонредно здружение на граѓани. 

Семинарот ќе се одржи на 28-ми и 29-ти мај во Дом на АРМ во Скопје со почеток во 12:00 часот. Влезот повторно ќе биде бесплатен. Kартите веќе може да се подигнат на две локации. Хотел Солун на рецепција и Кафе Пабло и во Кино Карпош и Излет Кафе! Деталите за настанов, како и програмата можете да ги проследите во ФБ групата на Зелена Алтернатива, на нивната официјална Веб страница, како и на објавениот ФБ настан.

„Ги известуваме сите оние кои се заинтересирани да присуствуваат на семинарот кој ќе се одржи следниот викенд, дека влезот за истиот како и на минатите два семинара ќе биде бесплатен, меѓутоа за влез ќе биде потребна карта. Картите ќе може да се подигнат од понеделник (23.05.16) на неколку локации низ градот кои навремено накнадно ќе ги објавиме“ - истакнува активистот и член на ЗА, Давор Ангеловски.

Како што веќе знаете, учесници на овој семинар ќе бидат врвни научници и доктори од Израел, Чешка, Шпанија, Канада, признаени како светски експерти на полето на канабисот. Голем дел од нив се членови на интернационални одбори на истражувачки центри и асоцијации за употребата на конопот. Тие ќе ни ги презентираат најновите сознанија од областа на употребата на канабисот, ќе ги споделат со нас искуствата од нивната работа и истражувањата за лековитоста на конопот.

„Главна и заедничка тема на овој семинар ќе биде употребата на канабисот во здравствената заштита, теорија и пракса. Со оглед на се` поголемиот број на граѓани од нашата држава кои го користат маслото од канабис, како здружение сметаме дека овој семинар ќе помогне да допреме до што повеќе граѓани и ќе допринесе за поголема едукација за тоа како правилно да се користи конопот. Со оглед на се` почестите заболувања на наши и ваши роднини, пријатели и познаници, веруваме дека на се` повеќе луѓе им е потребно маслото од канабис како за спречување и превенција, така и за лекување на повеќе болести и тегоби на ова модерно време“ - објаснува Филип Достовски, основачот на ЗА.

Затоа ве повикуваме да ни се придружите на овој семинар за заедно да ги слушнеме предавањата на водечките авторитети на полето на канабисот низ светот и да помогнеме во споделувањето на тоа знаење за понатамошното рушење на стигмата и предрасудите кои нашето општество ги има кон ова благородно лековито растение! Да научиме нешто повеќе и заеднички понатаму да ја продолжиме борбата за употребата на оваа билка во нашето секојдневие. Искористете ја оваа ретка можност да бидете дел од ваков собир и повелете придружете се. Ве очекуваме во што е можно поголем број! :)

Третиот канабис семинар во Скопје при крајот на мај!

Драги наши пријатели и подржувачи. Со голема радост и гордост сакаме да ве известиме дека здружението Зелена Алтернатива ќе го организира третиот по ред семинар на тема канабис, што ќе се одржи при крајот на месец Мај. 

Како и на минатите два семинара, така и овој пат гости ќе бидат еминетни доктори и научници кои како експерти се признаени и добро познати како лидери на истражувањата од оваа област. Тие со нас ќе го споделат своето знаење за лековитоста на ова растение, искуствата од нивната работа и ќе ни ги презентираат најновите сознанија од многуте студии кои секојдневно се одвиваат низ светот. 

На овој семинар ќе разговараме и ќе ве запознаеме со составот и различните состојки на канабисот, како и придобивките од истите. Тема на семинарот ќе биде и целосниот потенцијал на ова растение, кое освен за медицински цели нуди можност и за употреба во индустријата, каде може да се користи за широк спектар на различни производи. 

Ќе имате шанса да ги слушнете и активистите од нашата држава и нашето соседство кои ќе се обидат да ви ја доближат сликата за борбата со која постојано се соочуваат во намерите да го ослободат ова растение од стигмата која со години го следи и спречува сите ние да можеме да уживаме во благодетите што канабисот може да ги понуди. 

Дел од семинарот ќе бидат и пациенти кои се лекувале и сеуште се лекувааат со канабис и од кои од прва рака ќе можете да чуете за моќта на ова растение и нивните лични искуства во справувањето со различни болести и тегоби кои ги погодиле нив и нивните најблиски. Зелена алтернатива ќе се потруди да ве информира и за најновите случувања поврзани со канабисот низ светот, движењата за легализација и промените кои истите ги постигнале, како и разните новитети и производи од канабис кои се користат. 

Секако дека со вас ќе бидат споделени и нашите идеи за иднината на канабисот во нашата земја и начинот на кој сметаме дека ова прашање треба да се регулира. Затоа ве покануваме да го посетите овој семинар и да ја искористите оваа можност да се запознаете и да го надополните своето знаење за оваа билка на настан кој претставува реткост на овие простори. Следете ја оваа веб страница како и фејсбук групата на Зелена алтернатива каде редовно ќе ве информираме за новостите околу овој семинар, говорниците кои ќе учествуваат, како и за новите теми за кои ќе се разговара.

Втор канабис семинар во Македонија 27.09.2015, кино МИЛЕНИУМ, Скопје организиран од Зелена Алтернатива

Здружението „Зелена Алтернатива“ има особена чест и задоволство и оваа година да ве покани на семинарот на тема:

„Канабис: Теорија и пракса“
Елитата на Медицинскиот Канабис на едно место.

 

Семинарот ќе се одржи во кино Милениум, во недела, 27ми септември во 12:00 часот.
Картите за семинарот што ќе се одржи во недела во Кино Милениум се бесплатни, а може да се подигнат на билетара утре (сабота - 26.09.15) цел ден од 10:00 до 22:00 вечер! 

Предавачи на семинарот се: Рик Симпсон, Лумир Хануш и Пол Хорнби.
Рик Симпсон не е во можност лично да присуствува така да ќе говори преку Skype.

Др. Лумир Хануш во првиот дел од неговото обраќање ќе говори за ендоканабидоидите и компатибилноста на човечкиот организам и Канабисот. Во вториот дел ќе ни одговори на прашањето: Дали имаме доволно знаење за третманот со Канабис - стари и нови сознанија за медицинската вредност на Канабисот во лечењето на болни. Многу интересно ќе биде излагањето на др. Пол Хорнби: под наслов: Важноста на CBD-то (The importance of CBD).

Тој ќе се сконцентрира на важноста на CBD (канабидол), вториот по важност канабидоид во канабисот кој има огромна улога во модерните третмани со канабис. Тој ќе има осврт кон CBD-то екстрактирано од нашиот „македонски див коноп“ кој секоја есен залудно скапува по полињата и покрај патиштата во Македонија. Ќе зборува за важноста на ова македонско национално богатство во медицината и во лекувањето на болни и потенцијалот што овој ендемичен подвид на канабис би го имал на глобалниот-светски пазар.

Покрај овие светски експерти за медицински канабис на семинарот ќе присуствува и говори и Хуанито Луксетиќ од Хрватска. Тој долго време се бори со Мултиплекс Склероза и е тука за да ги сподели своите искуства со болните и заинтересираните во Македонија. Тој е воедно и многу гласен активист за легализација на медицинскиот канабис.

Целта на семинарот е овие долгогодишни истражувачи на канабисот и неговата примена во медицината да ги споделат своите искуства со македонската јавност. Се надеваме дека овој настан ќе придонесе за што побрзо носење на закон за легализација на конопот т.е. канабисот за медицински цели, се со цел да се излезе во пресрет на болните кои што го користат ова растение и неговите производи како лек.

Зелена Алтернатива ќе ги објави деталите околу семинарот во наредните неколку дена. Точното време, резервациите, подигањето на карти и деталната програма. Повеќе информации од понеделник на Facebook групата на Зелена Алтернатива. Овојпат бројката на посетители ќе биде поголема!

Ве покануваме и вие да бидете дел од овој научен собир.

Недела, 27ми септември 2015, кино МИЛЕНИУМ - Скопје.

 

Разгледајте го каналот на YouTube на Зелена Алтернатива. Таму ќе ги најдете предавањата од Првиот семинар за демистификација на канабисот.

Споделете го овој пост со вашите Facebook пријатели!